comédia

par Invité 06/04/10, 03:16 pm

محاكمة الحكام

بونضاضر

لق لق لق ! مقصدتش الحكام ديال الكورة، لحقاش هادوك مساكن
ما حاكمين حتا وزة، خصوصا المغاربة، جل القرارات خاطئة و جميع الأندية
تتشكا، و الفريق لي مهددش بالانسحاب من البطولة راسل الجامعة و تبكا.
و " بيانسير " متنلمحش لحكام الشعوب، أولا تنمعني عليهم، لحقاش هاد الحكام
حـــــاكمين و الله يعاونهم مساكن على شعوبهم، و الله يعزّ لحكام.

الحكام لي تنهضر عليهم، هوما حكام الضحك، أيــه حكام كوميديا، ناس نقايا و
لابسين مزيان و جالسين فكراسا عالين و ماشي بحال الكراسا لي مريحين عليهم
باقي المتفرجين، عليها تيشوفو السكيتشات بعين مختلفة، لحقاش واخا الجمهور
يموت ضحك و يصفق برجليه و يهلل، تايهز حكم الشرط الكرونو ديالو و تيقول " 5
دقايق 56 ثانية 2 تويشيات من المائة، وا نسيتي راسك أ بنادم، ايـــوا طلب
زهرك " ، بحالا مانعرف أش تابعنا، راه غير يسالي السكيتش بكري يزرعو الناس
ديال التلفازة شي اشهار مفروط نيــت، حسن خلي هاداك الشاب لي ضحك عليه
الزمان و ساسو يخرج الضحك لي فيه، و ايلا ما ضحكناش على الأقل يفوج مسكين
شويا على قلبو.

و في حالة ما سكت دجيري، تاينطق طوم، و تايقول " نتا راك زوين، ولكن هادشي
كامل لي قلتي شافرو، و قلتو أنا فسكيتش ديالي لي خرج فسيدي شحــال هادي،
و'' أونبليس'' عندك مشكل مع الركح ".

واعرا هادي، دجيري ملعق صدقات ليه بيعة و شرية و بدل البقيرات بالتلفازة -
لحقاش ما كاينش فرق كبير بينها و بين الزريبة - . أما سي طوم هالكنا
باشهاراتو و باللهجة المعوقة لي تتعيف، و للأسف هاد الاشهارات تايلونسيوها
مع الوقيتا ديال القص. و الفنان الكبيـــر ديالنا ما ضحكناش فأكثر من 30
حلقة من سلسلة البكا ديالو في رمضان، وبغا سكيتش كامل مكمول من شاب أول مرة
تيشوف كاميرات و بنات زوينات بالعين المجردة، و راكبو " لوتغاك" -
الضهشيرة زعما - بسباب الضو لي ضرب ليه فعينو و كملها عيله التصفاق و صوت
المنشط العندليب - رشيد لي مصور مع نور الدين رقصني يا جدع - .

أما العنصر النسوي تبارك الله وصافي، أول مرة يتم تمثيله بأستادة بكل ما
تحمل الكلمة من معنى، ماشي بحال النسخة الأولى و الثانية، هاد المرة الحكمة
مثقفة و وبنت الدومين و زوينة و لطيفة بصح، لمشكل الوحيد كاين فالمصطلحات
التقنية لي تتقول - لحقاش تبارك الله قاريا ماشي بحال مبارك مول عين الرحمة
- و ما تايفهمها حتا واحد، و لكن هي معدورة و ما تديرهاش بلعاني.

المهم (..) خاص حكامكم يحاولو شويا من التسلط ، و يدّروشو و مايبقاوش
يلعبو الخصوما..
أولا خصصو شي حلقة ديال الخيط الكحل غير ليهم هوما..